“Энг фаол спорт тарғиботчиси”

Зарбдор туманида жисмоний тарбия ва спортнинг оммавийлигини янада ошириш, тармоқ касаба уюшмалари тизимидаги умумтаълим мактаблари раҳбар ходимлари ҳамда мактабгача таълим муассасалари тарбиячилари ўртасида оммавий спортни янада ривожлантириш, уларнинг бўш вақтларида жисмоний тарбия ва спорт билан мунтазам шуғулланишларини кундалик турмуш тарзига сингдириш, турли спорт ўйинлари ва жисмоний машқларга қизиқтириш, оилаларда соғлом турмуш тарзини тарғиб қилиш, спорт-соғломлаштириш тадбирлари орқали уларнинг саломатликларини тиклаш хамда туман касаба уюшмаси кенгашининг “Кексаларни эъзозлаш йили” дастур тадбирларида белгиланган вазифалар ижросини таъминлаш мақсадида яқинда туман таълим,фан ва маданият ходимлари касаба уюшмаси кенгаши ҳамда туман халқ таълими муассасалари фаолиятини методик таъминлаш ва ташкил этиш бўлими ҳамкорлигида Ўзбекистон Республикаси Давлат мустақиллигининг 24 йиллиги байрамига бағишлаб “Энг фаол спорт тарғиботчиси” шиори остида  туман марказидаги  “Болалар ва ўсмирлар спорт мактаби”да ташкил этилган спорт мусобақаси юқори савияда, байрамона тарзда иштирокчиларнинг қизғин беллашувлари остида ўтказилди. 

Спорт мусобақаси тадбирида туман халқ таълими муассасалари фаолиятини методик таъминлаш ва ташкил этиш бўлими тизимидаги  умумтаълим мактаблари ва мактабгача таълим муассасаларидан иштирок этган спортчилар Низом асосида спортнинг 9 та тури бўйича  ўзаро беллашдилар. Мусобақа якунига кўра мактаб раҳбарлари ўртасида бўлиб ўтган мусобақада тумандаги 12-умумтаълим мактаби жамоаси фахрли 1-ўринни, 7-умумтаълим мактаби жамоаси вакиллари 2-ўринни қўлга киритишди. 9, 22-умумтаълим мактаблари вакилларига эса 3-ўрин насиб этди.

Мактабгача таълим муассасалари тарбиячилари ўртасида бўлиб ўтган қизғин беллашувларда 11-сон “Ғунча” мактабгача таълим муассасаси  тарбиячи қизларининг қўли баланд келди. 2-сон “Олтин бошоқ”мактабгача таълим муассасаси  фахрли 2-ўринни, 4-сон “Бойчечак” мактабгача таълим муассасаси жамоаси вакиллари 3-ўринни қўлга киритишди.

Спорт мусобақаси тадбирида туман ХТМФМТ ва ТЭ бўлими мудири Б.Элмуродов, “Зарбдор” газетаси бош муҳаррири А.Ўсканов, “Камолот” ЁИҲ туман кенгаши бўлими раиси А.Сулаймоновлар иштирок этишди.

Тадбир якунида  мусобақада фаол иштирок этган ва ғолибликни қўлга киритган спортчи педагог ва тарбиячиларга туман халқ таълими муассасалари фаолиятини методик таъминлаш ва ташкил этиш бўлими ҳамда туман таълим,фан ва маданият ходимлари касаба уюшмаси кенгашининг  дипломлари ва қимматбаҳо эсдалик совғалари тантанали равишда топширилди.

Мустақиллик байрами арафасида ташкил этилган ушбу спорт тадбиридан кўзланган мақсад тармоқ тизимида меҳнат қилиб келаётган касаба уюшма аъзоларини, айниқса аёлларни  спортга кенгроқ жалб этиш ва уларнинг саломатликларини мустаҳкамлашдан иборат бўлди.