“БИЗ БИР ОИЛАМИЗ, ЯХШИ-ЁМОН КУНДА БИРГАМИЗ”

Бугунги синовли кунларда ўзини англаган ҳар қандай инсон борки қўлидан келганча ён-атрофидаги меҳр ва эътиборга муҳтожлар ҳолидан хабар олиб, зарра бўлсада уларнинг оғирини енгил, мушкулини осонлаштириш мақсадида бақамтиликда ҳаракат қилишмоқда.

Ётиб еганга тоғ ҳам чидамас, деган гап бор? Бу нақлнинг исботини, айниқса, кам таъминланган ва эҳтиёжманд оилалар шу кунларда бошдан ўтказаётган бўлса, не ажаб?!

Жиззах вилояти касаба уюшмалари ташкилотлари бирлашмаси кенгаши раиси Сенатор Нусратулло Пардаев айни масалада тизим фаоллари билан кенгашиб, кундалик эҳтиёж учун зарур бўлган энг асосий озиқ-овқат маҳсулотлари рўйхатини шакллантирди.

— Эҳтиёжманд оилалар, ёлғиз кексалар, ногиронлиги бўлган шахслар ва аҳолининг бошқа ёрдам мухтож қатлами учун касаба уюшмалари туман, шаҳар кенгашлари, бошланғич касаба уюшма ташкилотлари томонидан 10 миллион сўмдан ортиқ озиқ-овқат, дори-дармон, дезинфекция маҳсулотлари тарқатилди. Бундан ташқари  бирлашма кенгаши ходимларининг ташаббуси билан бир кунлик иш ҳақи Меҳр-шафқат ва саломатлик жамоат фондининг ҳисоб рақамига ўтказиб берилди,-дейди Н.Пардаев.

“Биз бир оиламиз, яхши-ёмон кунда биргамиз”, дея бир мақсадда бирлашган касаба уюшмаси фаолларининг бугунги синовли кунлардаги бирдамлиги ўз самарасини бермай қолмайди.

Муқимбой ИСМОИЛОВ,

(Жиззах ҳақиқати)