Давлат дастури тадбирлари доирасида

2013 йил 27 август куни Жиззах вилоят касаба уюшма ташкилотлари бирлашмаси Кенгаши биносида Ўзбекистон Республикаси Мустақиллигининг 22- йиллигига биғишланган тадбир бўлиб ўтди. Тадбирда вилоят касаба уюшма ташкилотлари бирлашмаси Кенгаши ходимлари, касаба уюшмалари шахар ва туман кенгашлари раислари, вилоят касаба уюшмаларида кўп йиллар мехнат қилиб, нафақага чиққан фахрийлар, эҳтиёжманд, кам таъминланган оилалар вакиллари, вилоят ва Жиззах шахар телевидениеси хамда “Ишонч” газетасининг Жиззах вилояти бўйича мухбири иштирок этишди. 

         Тадбирда Ўзбекистон касаба уюшмалари Федерацияси Кенгаши “Обод турмуш йили” дастурининг 27-бандига асосан Ўзбекистон Республикаси Мустақиллигининг йигирма икки йиллик байрамига бағишлаб, эҳтиёжманд, боқувчисини йўқотган 12 нафар кам таъминланган аёлларнинг ҳар бирига 835,0 минг сўмлик электр маиший техника жиҳозлари топширилди.

  Шунингдек, ушбу тадбирда узоқ йиллар вилоят касаба уюшмалари тизимида меҳнат қилиб, нафақага чиққан меҳнат фахрийларидан 10 кишига вилоят бирлашмаси Кенгашининг қимматбаҳо совғалари топширилди.

“Обод турмуш йили” Давлат дастури тадбирлари доирасида Мустақиллик  байрами арафасида Истеъмол товарлари ишлаб чиқариш ва савдо ходимлари касаба уюшмаси аъзоларидан 3 нафар аёлга дам олиш сиҳатгоҳларига бепул йўлланмалар тақдим этилди.

Тадбирни олиб борган вилоят бирлашмаси Кенгаши раиси Н.Пардаев барча йиғилиш қатнашчиларини Мустақиллик байрами билан қутлаб, истиқлол берган неъматлар ва яратилган имкониятлар тўғрисида сўзлаб, уларга мустаҳкам соғлик, ишларига ривож тилади.

Тадбирда сўзга чиққан вилоят касаба уюшмалари меҳнат фаҳрийси Мамадазизов Собир, эҳтиёжманд, кам таъминланган оила вакилларидан Дўстлик туман “Наврўз” қишлоқ фуқаролар йиғинида истиқомат қилувчи Жангирова Феруза, Мирзачўл туман “Дўстлик” маҳалла фуқаролар йиғинида истиқомат қилувчи Холмирзаева Гавҳарлар ўз сўзларида юртбошимизга, касаба уюшмалари Федерацияси ва тадбир ташкилотчиларига ўз миннатдорчиликларини изҳор этдилар.